陳淑莊：投白票抗議有用 (蘋果日報2013年11月16日) - 港人之無力感

記：《蘋果》記者
陳：前立法會議員陳淑莊

記：陳百祥（阿叻）稱若熄機行動令無綫台慶只得2、3點收視率，會「跪返屋企」、「死咗佢」，如何看他這番言論？
陳：我覺得好囂張，唔覺得有講笑成份，係似超級建制派……不過算啦，呢啲嘢好講家教、個人修養。第一次我當你講笑，話要跪返屋企，但跟住仲要講死，究竟咁講幫到乜嘢？係咪要攞啲咁嘅彩？呢啲人唔單止冇為社會做番啲嘢，仲要令社會更加撕裂，講埋咁挑釁性說話。生死係唔可以講笑，攞呢啲嘢去做賭注，又何必呢？令件事火上加油。
（輕視香港人？）好明顯就係睇死香港人，根本就睇死個市場、睇死埋政府。你夠膽郁我咩？我𠵱家照做，你又奈我唔何。如果無綫話罷做6個鐘，政府仲驚過乜。無綫收少6個鐘廣告費有乜所謂，輸得起，獨大到呢個地步，我哋睇電視冇選擇，想要高質素（節目）、想轉台都冇機會，佢嘅說法真係與民為敵。
記：網民早前發起熄電視行動，無綫在黃金時間收視最高跌4點；今次又發起罷看台慶，有沒作用？
陳：嗰晚（10月30日）我喺電台做節目，電話接個不停，打嚟都係公公婆婆，同接電話嘅同事講，電視我熄咗喇。我好感動，好多都係「老友記」，除咗睇電視，平時冇乜娛樂，但佢哋都要撐。我覺得真係有希望，唔係大家諗到香港人咁冷感，淨係掛住搵錢。
講真，跌到呢幾點都唔差喎，1點就1點，2點就2點，每1點都係咁緊要。最大鑊係市民無力感，你越係覺得無力，就越助長你唔想見到嘅嘢發生，嗰啲人會用盡任何方法令你更加無助無力。呢個就係佢哋嘅詭計，只要跌入一次佢哋呢個陷阱，你好難再跳番出嚟，所以有幾點就幾點喇。
（預計今次成效如何？）香港人往往會畀驚喜我哋。記得好多次遊行，嗌咪嗌到喊晒，諗住已經見到龍尾，點知仲未收得工。香港人從來都冇咁易被打低，當你連番打擊，反而令香港人更加火滾。
記：無綫被指一台獨大，亞視不思進取，但香港人邊鬧邊睇，如何理解？
陳：唔單止電視，好多嘢我哋都助長緊。你登記做選民，但唔投票，我聽過好經典解釋：「我要做個負責任選民，因為冇睇過個政綱，所以唔投票。」你聽完真係坐喺度。攞番電視嚟講，有人會話：「我唔知有乜節目，不如睇番睇開個台啦！」又要睇又要鬧，其實唔睇有乜損失？香港人就係咁，點解唔做番啲積極嘅嘢？
電視台係攞住收視點同人sell（廣告），收你幾多錢都係base on個percentage，你夠膽熄電視，長時間維持低收視，無綫死梗啦，一定要減價。你以為開住電視機只係有聲音，其實係令到佢有高收視，可以攞住呢啲數字去同大財團講，你喺呢段時間買廣告，我獨大，你有錢嘅梗係買我啦。唔好以為開住電視機純粹得數字（收視率）出嚟，到最後袋錢係無綫，羊毛出自羊身上，唔好以為我哋冇畀錢，兜個圈一樣咋。
記：你曾經是電視迷，以前如何度過台慶？現在又怎樣？
陳：以前台慶好緊要，真係唔轉得台，同你死過㗎。以前（表演）好拚命，周潤發、沈殿霞、楊盼盼，最爆整多個吳剛師傅出嚟。唔好理取巧定乜嘢，起碼人哋一早有練習，好認真咁做。𠵱家咪唱歌、遊戲囉，胡胡鬧鬧，其實胡鬧嘅嘢，「超級無敵蔣麗芸」都胡鬧咗十幾年啦。
台慶喺我生命中已經唔再係特別日子，有乜突破？根本連做台慶嘅人都冇諗住突破，慣性收視嘛。
記：熄機之後，香港人下一步可以怎做？
陳：今次電視（發牌事件）令大家清楚感到不公義情況，咁點可以打破不公義局面呢？就係一個民主化發展，要有一個制度令市民嘅聲音備受尊重。最重要係打破𠵱家嘅政治架構。嚟緊有政改討論，不能依賴某啲政黨或意見領袖，冇你，我哋冇力，你唔做嘢，其實助長緊對方繼續擴大。
正如我哋有選擇嘅話，可以睇非亞視非無綫電視節目，但𠵱家我哋唔得，要焗住（睇）。除非熄機，其實熄機等於投白票，話畀大家聽，我願意參與呢個行動，抗議我冇選擇。呢個白票行動似舊年3.23（民間全民投票），你叫我喺唐英年同梁振英之間，我真係揀唔到。